Mundartsprecherinnen und Mundartsprecher, Geistesschwestern und Geistesbrüder,
liebe Pälzerinnen und Pälzer!
Mir ha’mm uns in de Kopp‘ gesetzt
uff uns’re naie Seit im Netz
als’emool vun Zeit zu Zeit
fer Gäscht unn‘ int’ressierte Leit
bei uns unn‘ a’ch an ann’re Schtelle
immer mol was ei’zuschtelle‘.
So wärd, seit e‘ paar Daage jetzt
uff Youtube immer fortgesetzt
erzählt was mir getriwwe hamm,
wann mir mol nit uff Biehne war’n.
Vum Vadderdag dringt jetzt ans Lischt
vun Zeit zu Zeit en Korzberischt
In well’em‘mer dann als sehe kann,
wie mir den Daag gefeiert ha’mm!
Unn‘ daß des net alles bleibt,
gibt’s ausserdem exakt seit Heit‘
vum letschte Johr im Bürgerhaus
Schorle live bis dort en’aus!
Drum wann Eisch mol die Naigier juckt,
als noigeklickt unn‘ aa‘geguckt!
Zum Schluß wollt’mer fer viele Daage
Eisch all mit’nanner Danke sage,
die aach im Rege‘ bei uns waren,
die mit’m Auto weit gefahre‘
in Fleerschm, Hambach, Ludwigshafen
oder dursch de Wald durschlafen
näckscht Woch‘ zum Pälzerwaldverein
um uff de Hohe Loog zu soi!
Ihr Alle seid vor alle Sache de‘ beschte Grund zum Musik mache!
Fer ins Bett ruft schun die Uhr,
doch einsam an de‘ Taschtadur
klappert im Laternelischt
en anonymer Giddarischd.
Des bin wiedä isch gewese‘
unn‘ Ihr kännts im Blog drin lese‘,
liewe Grieß, de Edsel!
