Liewe Zuhörer, Zuschauer, Mitmacher, und Freunde, 

nachdem zuletscht alle uff Facebook g’schriwwe hawwen und des Gäschdebischl wesche'm defekt e biss’l verwaist iss mescht’isch de Blog mol widder wachkisse unn‘ misch zuallerallererscht mool bei unserem Publikum bedanke, des nit nur zahlreisch sondern geradezu euphorisch zu uns kumme is. Mit himmelweite Aa’fahrte vun zum Deel mehrere hunnert Kilometer um mit uns zusamme aus Konzerte rischtische Volksfeschte zu mache‘! – Dankschää dodefor.

Wie wann des noch nit genug wär‘ hawwen mir dank Eisch 3 Lieder in de‘ Top 1000 uff SWR 1 in de‘ Heererhitparad‘. Die erscht Nummer war „Alles weil mer Pälzer sinn‘“ die annere Zwee kummen noch awwer kääner weß wann. Jetzt sitze’mer all‘ am Radio unn kauen uns die Fingernesch’l wann mer draa sinn? Mittlerweile isses schunn unner Platz 460 s’geht also immer weiter!

Des habt Ihr gemacht unn‘ dodefor meschten mir Eisch schunnemool ganz härzlisch Dankschää sache, die anonyme Giddarischde